Татар мәгарифе порталы
Сез монда
Бүген Татарстан Премьер–министры Рөстәм Миңнеханов Татарстан Республикасының Мәгариф һәм фән министрлыгы коллективына яңа министр – Альберт Гыйльметдиновны тәкъдим итте. Чарада шулай ук Татарстан Республикасы Президенты Аппараты җитәкчесе Юрий Камалтынов катнашты.
Татарстан Мәгариф һәм фән министрлыгын ике ел чамасы җитәкләгән Наил Вәлиев дүртенче чакырылыш Татарстан Республикасының Дәүләт Советы депутаты итеп сайланды, ул Татарстан Республикасының Фәннәр академиясендә вице–президент сыйфатында эшләвен дәвам итәчәк. Татарстан Республикасы Президенты Указы нигезендә, 2008 елга кадәр Татарстан Республикасының Мәгариф һәм фән министры урынбасары вазифасын башкарган, Казан дәүләт университетының гомуми физика кафедрасы профессоры Альберт Гыйльметдинов яңа министр итеп билгеләнде.
Татарстан Мәгариф һәм фән министрлыгы коллективына беренчеләрдән булып Татарстан Республикасының Хөкүмәте башлыгы Рөстәм Миңнеханов мөрәҗәгать итте. Р.Миңнехановның сүзләренә караганда, Татарстан Республикасы Президенты республика Мәгариф һәм фән министрлыгы алдына бик җитди бурычлар куя.
“Яңа шартларда эштә яңа алымнар, инновацияләр кулланучы, алдынгы карашлы кеше кирәк, – диде Рөстәм Миңнеханов. – Казан дәүләт университетында, чит илдә эшләгән чорда Альберт Харис улы туплаган тәҗрибә бик тә ярап куячак. Ул чит илдә үз мөмкинлекләрен күрсәтүгә ирешкән бик әзерлекле кеше. Әлеге сыйфатлар республикада мәгарифне сыйфат ягыннан яңа дәрәҗәгә күтәрергә мөмкинлек бирер дип уйлыйм”. Татарстан Хөкүмәте башлыгы Татарстан Республикасының Мәгариф һәм фән министрлыгы коллективы, яңа министр алдына бик җитди бурычлар куелуын искәртте. Аерым алганда, бу – киң колачлы Президент программасын эшләү, “ул якын киләчәктә Татарстан Республикасының Мәгариф һәм фән министрлыгының гына түгел, ә Хөкүмәт, республика җитәкчелегенең эшендә дә өстенлекле юнәлеш булачак”.
Татарстан Республикасы Мәгариф һәм фән министрлыгының элеккеге башлыгы турында сөйләгәндә, Рөстәм Миңнеханов Наил Вәлиевнең ике елга якын республика мәгариф системасын җитәкләвен, ә хәзер депутатлар корпусын ныгытачагын һәм Фәннәр академиясендә эшләвен дәвам итәчәген ассызыклады. “Бу аңа мәгариф системасында эшләгән елларда туплаган фәнни юнәлешләрен һәм тәҗрибәсен гамәлгә ашырырга мөмкинлек бирәчәк”, – диде Премьер. Рөстәм Миңнеханов элеккеге министрга яңа эшендә уңышлар теләде һәм чәчәк букеты тапшырды.
Үз чиратында, Наил Вәлиев министрлыкта бүгенге мәгариф системасы алдына куелган бурычларны хәл итәргә сәләтле яхшы, оешкан команда туплануын билгеләп үтте. Ул Татарстан Республикасының Фәннәр академиясе һәм Татарстан Мәгариф һәм фән министрлыгы үзара аерылгысыз бәйләнгән булуын искәртте һәм бергәләп эшләүнең нәтиҗәле юлларын табачакларына ышаныч белдерде.
“Мин Президент һәм Премьер–министрга күрсәткән ышанычлары өчен рәхмәт белдерәм, – диде Альберт Гыйльметдинов. – Әмма бу әле зур җаваплылык та. Әлеге тармакның кешеләр тормышы өчен никадәр мөһим икәнлеген яхшы беләм. Шулай булгач безнең алда зур бурычлар тора”.
Альберт Гыйльметдинов 1956 елның 27 июлендә Казанда туа. 1978 елда “физика” белгечлеге буенча В.И.Ульянов–Ленин исемендәге Казан дәүләт университетын тәмамлый.
Аспирантураны тәмамлаганнан соң 1981–2000 елларда Казан дәүләт университетында кече фәнни хезмәткәр, ассистент, гомуми физика кафедрасы доценты булып эшли. 2000 елдан – Казан дәүләт университетының гомуми физика кафедрасы профессоры. 2007–2008 елларда Татарстан Республикасы мәгариф һәм фән министры урынбасары булып эшли.
2009 елның 17 мартыннан – Татарстан Республикасы мәгариф һәм фән министры.
“Соросов доценты” (1997, 1998, 1999, 2000). Атом спектроскопиясе буенча Халыкара премия лауреаты (1995), Йоханус Маркус Марси исемендәге медаль белән бүләкләнгән (1998). Россия Фәннәр академиясенең аналитик химия Гыйльми советы, АКШның спектроскопия җәмгыяте, Нью–йорк фәннәр академиясе әгъзасы.
Кайбер Халыкара журналларның редколлегия әгъзасы, КДУның докторлык диссертацияләре советы әгъзасы.
Өйләнгән, ике баласы бар.
Чыганак: www.tat.tatar-inform.ru