Татар мәгарифе порталы
Сез монда
Мәктәптә һәм балалар бакчасында ата-аналардан законсыз рәвештә акча җыю проблемасы кискен борылыш алды. Шунысы кызык, моңа кадәр бу проблема турында сөйләүче бик юк иде. Ә 94нче гимназиядә булган очрактан соң, бу проблема зур шау-шу тудырды. Казанның Кеше хокукларын яклау үзәгендә шушы мәсьәләгә бәйле ачылган «кайнар линия»гә бер ай эчендә 52 кеше мөрәҗәгать иткән. Бу очракка кадәр ата-аналар әллә тавыш куптарырга курыккан, әллә акча җыюны кирәк һәм дөрес эш дип уйлаган.
Хокук яклаучылар 30 мәктәп һәм гимназия, 8 балалар бакчасында акчаның никадәр тотылуын тикшерүне үтенеп, республика прокурорына гариза тапшырган. Аларга карата белдерелгән шикаятьләр расланса, җитәкчелеккә карата чаралар күреләчәк. «Мөрәҗәгать итүчеләрнең күбесе белем бирү йорты җитәкчелегеннән куркып, үзләренең исем-фамилияләрен әйтергә теләмәде. Билгеле инде, бу акчаларның мәҗбүри рәвештә җыелуын исбат итә», - диде Кеше хокукларын яклау үзәге җитәкчесе Игорь Шолохов.
Казанның 1нче гимназиясендә укучы баланың әти-әнисе шалтыратып түбәндәгеләрне җиткергән: «1 мең сум сыйныф фондына һәм тагын 1 мең сум мәктәп фондына җыялар. Чыгарылыш кичәсенә 10 мең сум сорадылар. Моннан тыш, мәктәпне җыештыруга һәм аны саклауга даими рәвештә акча таләп итәләр. Акча бирүдән баш тартучыларга директор башка мәктәпкә күчергә куша. Директор үзенә алтын сәгать кебек кыйммәтле бүләкләргә заказ бирүдән дә тартынмый. Ә бер бәйгедә гимназия 1 миллион сум акча яулады һәм ул акчаның нәрсәгә тотылуы беркемгә дә мәгълүм түгел. Ләкин директор һәм аның кызы өр-яңа машинада җилдерә хәзер».
Үзәкнең матбугат хезмәте хәбәр итүенчә, бу очракта Россиянең «Мәгариф турында»гы законы бозыла. Закон нигезендә дәүләт гражданнарга бушлай башлангыч, төп гомуми һәм урта гомуми белем алуны гарантияли. Ә өстәмә акчалар кешенең үз теләге белән генә алынырга мөмкин.
Чыганак: www.intertat.ru