Россиянең 14 регионыннан 69 укучы һәм 27 мөгаллимне билгесезлектә тоткан көннәр узып китте. Ярышлар тәмам, нәтиҗәләр чыгарылган, җиңүчеләр билгеле.

Олимпиада Петровский бистәсендә урнашкан “Регина” кунакханәсендә узган иде. Ярышта Самара, Оренбург, Чиләбе, Түбән Новгород, Төмән, Киров, Свердловск өлкәләреннән, Башкортстан, Мордовия, Марий Эл, Удмуртия, Чувашия Республикаларыннан, Пермь краеннан, Саратов шәһәреннән 9, 10 һәм 11 нче сыйныф укучылары көч сынашты. Чараның максаты – туган (татар) телнең дәрәҗәсен һәм укучыларның гыйлемлелек сыйфатын арттыру; белем алучыларга һәм татар теле һәм әдәбиятын укытучы мөгаллимнәргә гамәли ярдәм күрсәтү; Россия Федерациясе субъектларының мәгариф идарәләре арасында төзелгән мәгариф өлкәсендә хезмәттәшлек турындагы килешүне тормышка ашыру.

Татар теленнән I урынны Гөлфия Кәбирова һәм Илүзә Шәймарданова (Оренбург өлкәсе, Бакай авылы урта мәктәбе) алалар. Татар әдәбиятыннан I урын Төмән өлкәсе кызы Илсияр Речапова һәм Удмуртия Республикасыннан Рөстәм Мөхәммәтҗановка бирелә. Тулырак мәгълүмат беркетелгән файлда.