Татар мәгарифе порталы
Сез монда
Шушы көннәрдә Ижевски шәһәренең Тимерьюлчылар мәдәният йортында татар гимназиясенең 10 еллык юбилее үтте. Залда утырган Удмуртия Республикасы Милли сәясәт, Фән һәм мәгариф министрлыклары, шәһәр һәм район идарәләреннән килгән белгечләр, милли оешма җитәкчеләре һәм бик күп кунаклар үзләренең чыгышларында гимназиянең елдан-ел чәчәк атуына, бүгенге көндә аның республикага гына түгел, ә бөтен Россиягә танылуына басым ясадылар. Ул көнне хезмәтләре өчен Эльвира Хуҗатова Фән һәм мәгариф министрлыгының, Ирина Марамзина, Ирина Залялиевалар шәһәр мәгариф идарәсенең, ә Гөлнирә Гафиева район мәгариф бүлегенең Мактау кәгазьләре белән бүләкләнгән.
Кичәдә Кузебай Герд исемендәге удмурт гимназиясеннән дә кунаклар катнашкан. Алар башкаруында яңгыраган удмурт җырлары юбилейны дуслык бәйрәменә әверелдергән.
Бәйрәмнең иң дулкынландыргыч мизгелләре булып чыгарылыш һәм беренче сыйныф укучыларының тантаналы рәвештә сәхнәгә күтәрелүе, нәни гимназистларның барлык халык алдында телебезне сакларга, өлкәннәрне хөрмәт итәргә, тырышып укырга ант бирүләре булгандыр.
Сәхнәгә элек 20нче татар мәктәбендә белем алган әби-бабайларның 6нчы татар гимназиясендә белем алучы һәм киләсе елда бирегә килергә җыенучы оныклары белән чыгыш ясаулары кемне генә битараф калдырды икән?! Димәк, 6нчы татар гимназиясе элеккеге 20нче татар мәктәбенең традицияләрен дәвам итеп, милләтебез горурлыгы булырдай укучылар тәрбияләячәк. Без моңа ышанабыз, чөнки аның беренче шытымнары бар инде, дип яза Удмуртия татарларының «Яңарыш» газетасы.
Чыганак: «Татар-информ»
- Караулар саны: 2828
- Бастыру