Татар мәгарифе порталы
Сез монда
Россиянең 14 югары уку йорты арасында безнең студентлар иң шәп сценарист булды. Без моның турында язган идек инде. В.И.Ульянов-Ленин исемендәге Казан дәүләт университетының Роман-герман бүлеге укучылары Евгения Селеванова белән Татьяна Онегина Мюнхенның Гете исемендәге Немец институты игълан иткән “Читләр белән очрашу” исемле конкурста беренче булдылар. Бүләк кызыктырырлык – Германия белгечләре аларга мастер-класс уздырачак иде.
Бүген Казан дәүләт университетының Европа белән элемтә үзәгендә мастер-класска 15ләп студент, җитәкчеләре, чит ил әдәбиты кафедрасы доценты Елена Шевченко һәм, вәгъдә ителгәнчә, немец режиссеры һәм драматургы Одетте Береска, театраль педагог Верена Гериах жыелды.
Одетте Береска сүзләренә караганда, Гете исемендәге Немец институты оештырган әлеге бәйгенең төп максаты – мәктәп укучыларында, студентларда алар теленә кызыксыну уяту. “Конкурста катнашкан һәр укучы-студентка институт махсус сертификат да тапшырачак. Бу аларга немец телен алга таба өйрәнүгә стимул булачак”, - диде ул.
Казан командасы әзерләгән “Автобус” исемле спектакль жюрины таң калдырган. Евгения спектакльнең эчтәлеген болай аңлатты:
- Автобус – ул безнең жәмгыять, дөресрәге, аның кечерәйтелгән формасы. Безнең арада төрле конфликтлар була, аларның чыганаклары да төрле. Бу төрле даирә кешеләре арсындагы конфликт та, ике буын арасындагы бәхәс тә, ике милләт вәкиле арасындагы каршылык та. Автобуста аларның барсы да бер-берсе белән очраша ала. Без менә шуны спектакль формасына китердек тә инде. Әсәрнең төп идеясы – кешеләрдә толерантлык хисен тәрбияләү. Мастер-класс дәвамында режиссер Одетте театр серләренә, ә педагог Верена сәхнәдә үзеңне ничек тотарга кирәклеге турында җентекләп сөйләде. Спектакльдә актерлар ролен авторлар үзләре башкарачак.
- Караулар саны: 2808
- Бастыру