Татар мәгарифе порталы
Әле күптән түгел Татарстан китап нәшриятында кыскача үзбәкчә-татарча мәкаль һәм әйтемнәр сүзлеге дөнья күрде. Әлеге сүзлекнең авторы - Үзбәкстан Республикасы Фәннәр Академиясенең Алишер Нәваи исемендәге тел һәм әдәбият институты өлкән фәнни хезмәткәре, филология фәннәре кандидаты Габдерәхимов Максуд Мөгаллим улы.
Үзбәк халкының да, татар халкыныкы кебек үк бай фольклор мирасы бар. Әлеге тугандаш халыкларның фольклор иҗаты (мәкальләре, әйтемнәре, табышмаклары, әкиятләре) бик охшаш, аларның күбесе төрле легендалар белән бәйле. Кыскача үзбәкчә-татарча мәкаль һәм әйтемнәр сүзлегендә үзбәк һәм татар халкы арасында булган тарихи мәдәни бергәлек чагыла, китапта ике тугандаш халыкның гомер-бакый дус булып аралашып яшәгәннәрен, мәдәниятләренең никадәр тыгыз бәйләнгән һәм охшаш булуларын күрергә була.
Кайбер шундый мисалларны карап китик:
Ватансиз инсон - куйсиз булбул (үзб.),
Ватансыз кеше - бакчасыз сандугач (тат.)
Айрилганни айиқ ер, бўлинганни бўри ер (үзб.),
Аерылганны аю ашар, бүленгәнне бүре ашар (тат.)
Айтилган сўз - отилган ўқ (үзб.),
Әйткән сүз - аткан ук (тат.).
Якын арада әлеге китапны тәкъдир итү дә булачак. Сүзлек буенча сораулар белән Татарстан Республикасы Министрлар Кабинеты Мәдәният һәм Татарстан Республикасы халыклары телләрен үстерү бүлегенең Татарстан Республикасы халыклары телләрен үстерү бүлекчәсе мөдире Шәйхиева Фирая Разыйх кызына мөрәҗәгать итәргә мөмкин.