12 август көнне Бөек Ватан сугышы музей-мемориалында «Сугышчан ахирәтләр» ветераннар клубының очрашуы булачак. Очрашуда сүз Советлар Союзы Герое Мәгүбә Сыртланова хакында барачак.

Бөек Ватан сугышы елларында хәрби-һава көчләренең батырлыклары хакында без тарих битләреннән яхшы беләбез. Татарстан егетләре һәм кызларының каһарманлыклары турында да горурланып искә алырлык вакыйгалар бик күп. Советлар Союзы Герое исеменә лаек булган татар кызы Мәгүбә Сыртланова - легендар очучылардан.

Музей хезмәткәрләре сүзләренә караганда, Германиядән килгән туристлар бүгенге көнгә кадәр музейга куелган «Рус фанералары» (заманында немецлар рус самолетларын шулай атаган) һәм «Төнге убырлар» («Ночные ведьмы») экспозицияләрен кызыксынып өйрәнә. Экспозициядә М.Сыртланованың җәйге шлемын һәм шәхси документларының күчерелмәләрен күрергә мөмкин.

Чал тарих битләрендә исемнәре алтын хәрефләр белән мәңгеләштерелгән шәхесләребез хакында белергә теләсәгез, музей залларына рәхим итегез!

Чыганак: http://intertat.ru