Хөрмәтле бәйгедә катнашучы интернет-проектларның авторлары һәм порталыбыз кунаклары!

"Белем җәүһәрләре" II бөтендөнья интернет-проектлар бәйгесенә нәтиҗәләр ясау вакыты да якынлашып килә. Жюри әгъзаларының инде күбесе сайтлар белән танышып чыкканнар һәм оештыру комитеты адресына нәтиҗәләрен юллаганнар. Алга таба әлеге барлык нәтиҗәләрнең бәяләре кушылачак һәм бәйгедә катнашучы проектларның рейтингы булдырылачак. Килеп чыккан нәтиҗәләр тагын бер мәртәбә Жюри рәисе тарафыннан расланачак һәм без инде бәйгенең җиңүчеләрен беләчәкбез.

Жюри эше тәмамлануга ук бәйгенең оештыру комитеты үз кулланучыларын рәсми сайтның Жюри битендә сайтларны бәяләгән шәхесләр белән таныштырып үтәчәк. Ә инде бәйгедә кемнәр җиңүен 29 октябрь көнне "Казан" милли-мәдәни үзәгендә узачак тантанада белү мөмкин булачак. Бу тантанада быелгы бәйгенең җиңүчеләре, узган елгы "Белем җәүһәрләре", бәйгене оештыручылар һәм жюри әгъзалары, чакырылган кунаклар, телевидение һәм пресса катнашыр дип көтелә. Тантананың төгәл вакыты әлегә ачыкланмаган (11.00 сәгатьтә дип планлаштырыла).