Узган ял көннәрендә Казан дәүләт университетының актлар залында FISU бәя бирү комиссиясе әгъзалары Казан шәһәре студентлары белән очрашты.

Кунакларны КДУның ишек төбеннән үк каршы алдылар. Биредә Татарстанның барлыгы 11 югары уку йортыннан йөзәрләгән студент Универсиада аләмнәрен җилфердәтә иде. FISU бәя бирү комиссиясе әгъзалары Казан шәһәре мэры Илсур Метшин, Татарстан Республикасының Мәгариф һәм фән министры Наил Вәлиев, Татарстан Републикасының Яшьләр эшләре, спорт һәм туризм буенча министр Марат Бариев, КДУ ректоры Мәгъсүм Сәләхов җитәкчелегендә актлар залына узды.

Биредә сүз башта КДУның спорт өлкәсендәге уңышлары турында барды. Ректор Мәгъсүм Сәләхов әйтүенчә: “КДУ беркайчан да үзенең төп традициясенә, “Сәламәт тәндә - сәламәт акыл” гыйбарәсенә хыянәт итмәде. XIX гасырда ук студентлар физик тәрби белән шөгыльләнгәннәр. Бу хәзер дә дәвам итә - фән белән беррәтән КДУда мәдәният һәм спорт та үсеш ала. Казан дәүләт университетында бүген спортның 40 төре аеручы активлардан.”

Шуны да ассызыклап узарга кирәк, бездә үзебездә дә республикакүләм Универсиада уза. Биредә Татарстан югары уку йортларының иң талантлы яшь спортчылары көч сынаша, җиңүләр яулый, рекордлар куя.

Казан шәһәре мэры Илсур Метшин фикеренчә, Универсиада узу хөрмәтенә шәһәребез үсәргә стимул алачак, нәкъ Казанның 1000 еллыгын бәйрәм иткәндәге кебек. “Казан яшьләре һәм студентлары – ачык йөзле, кунакчыл, креатив, үз көчләренә ышанган кешеләр. Андый яшьләр дөньяда бүтән юк. Шуңа мин Казанның җиңүенә ашанам”, - диде ул. Студентларның Универсиада уздырырга теләге зур икәнен FISUның вице-президенты Стефан Берг та күрми калмаган. “Студентларыгыз күзләрендә Универсиада-2013не кабул итү хыялын күрәм мин”, - диде ул.

Ә иң кызыгы, очрашу азагында булды, югары уку йортларының булачак студентлары, әлегә мәктәп укучылары FISU бәя бирү комиссиясенә гадәти булмаган бүләк тапшырды. Бу – секундомер, һәм ул быелның 31 маенда Брюссель шәһәрендә Универсиада-2013 үтәчәк шәһәрне игълан иткән мизгелдән вакытны кирегә саный башлаячак.