Татарстан укучылары арасында быел имтиханнарда 100 балл җыю очраклары арткан. Узган ел андыйлар саны 109 булса, быел ул күрсәткеч 416 га җиткән. Бу хакта бүген Бердәм дәүләт имтиханын тапшыруга багышланган матбугат очрашуында ТР Мәгариф һәм фән министрының беренче урынбасары Данил Мостафин хәбәр итте.
Аерым алганда, химиядән – 216, инглиз теленнән – 18, информатикадан – 40, физикадан – 36, математикадан – 15, биологиядән 21 кеше 100 балл җыйган.

Берничә предметтан 100 балл җыючылар да бар.

Яр Чаллының 26 нчы гимназиясен тәмамлаган Максим Мордяшов физика, математика һәм информатикадан Бердәм дәүләт имтиханын 100 баллга тапшырган. Ул Мәскәү дәүләт университетының механика-математика факультетына укырга керергә җыена. Ул - укучыларның математика буенча бөтенроссия олимпиадасының муниципалитет һәм республика этаплары, “Воробьев тауларын буйсындыр - 2012-2013” вузара олимпиадасының йомгаклау этабы, физика буенча 52 нче күчмә Физика-математика олимпиадасы, информатика буенча КФУның Яр Чаллы филиалы уздырган предмет олимпиадасы призеры. Мәктәп укучыларының математика буенча "Ломоносов" вузара олимпиадасының, информатика буенча "КИТ - компьютерлар, информатика, технологияләр" бөтенроссия бәйгесенең йомгаклау этабы җиңүчесе.

Татарстанда шулай ук Кукмара районының Зур Сәрдек гимназиясе укучысы Гөлназ Садриева рус теле, биология һәм химиядән 100 балл җыйган. Гөлназ мәктәпне алтын медальгә тәмамлаган, бик яхшы билгеләренә генә укыган. Биология буенча бөтенроссия олимпиадасында катнашкан. Аның табиб булу теләге зур.

Данил Мостафин хәбәр иткәнчә, 100 балл җыйган укучыларның мәктәптәге өлгереше тикшерелгән, электрон журналлар каралган. Артык аермалар булмавы ачыкланган.

Быел ике предметтан 100 балл җыючы 25 укучының Казан, Яр Чаллы, Бөгелмә, Түбән Кама, Әлмәт шәһәрләрендә, Кукмара, Менделеевск һәм Азнакай районнарында белем алганнары ачыкланган.

Быел шулай 90 һәм аннан да күбрәк балл җыйган укучыларның да рус теле, тарих, информатика һәм ИКТ, химия һәм физика буенча эшләре предмет комиссияләре тарафыннан кабат тикшерелгән. Нәтиҗәләр үзгәрешләр кертүне таләп итмәгән.

Бу уку елында рус теле буенча уртача балл 54,5 проценттан 67,5 баллга кадәр үскән. Бигрәк тә Бөгелмә, Арча районнары, Казанның Вахитов һәм Идел буе районнары яхшы күрсәткечләр күрсәткән. Математикага килгәндә, 41,9 га 56,6 нисбәтендә.

Гомумән алганда, республиканың 16 районы БДИны проблемаларсыз тапшырган. Дүрт күрсәткеч буенча иң яхшы уку йортлары да – Яр Чаллының 26 нчы гимназиясе, Казанның 131 лицее, Бөгелмәнең предметлары тирәнтен өйрәтүле 6 нчы мәктәбе билгеләнгән. Алар рус теле һәм математика буенча уртача баллар, югары баллар җыючылар һәм аттестатсыз калучылар саны буенча ачыкланган. Әлеге исемлекне Нурлатның 2 нче урта мәктәбе һәм Тукай районының Бәтке урта мәктәбе тулыландыра.

Чыганак: http://tat.tatar-inform.ru