Татар мәгарифе порталы
Сез монда
Балалар шагыйрәсе, биш бала анасы Йолдыз Шәрәпова Интернет челтәрендә үз сайтын булдырды.
Сайтта шагыйрә турында язмалар, аның иҗатының чагылышы булган фикерләр, биографиясе, гаиләсе һәм иҗатын яратучылар белән төшкән фоторәсемнәр, дөнья күргән шигырьләре һәм басма китаплары турында мәгълүмат бирелгән. Шулай ук кунак битендә үз фикерләреңне калдырырга мөмкинлек бар.
Балалар шагыйрәсе Йолдыз (Йолдыз Әдип кызы Җамалетдинова-Шәрәпова) 1962 елның 10 апрелендә Татарстанның Буа районы Яңа Тинчәле авылында укытучы гаиләсендә туган. Бала-чагы әнисе белән әбисе тәрбиясендә уза. 1979 елда Яңа Тинчәле урта мәктәбен тәмамлап, укуын Казан университетының филология факультетында дәвам иттерә. 1984 елда университетны уңышлы тәмамлап чыккач, бераз вакыт «Ялкын» журналында - әдәби хезмәткәр, аннан Биектау район газетасында корректор булып эшли. 1986 елдан ул - «Яшь ленинчы» (хәзерге «Сабантуй») газетасы хезмәткәре, соңгы елларда редакциянең әдәбият бүлеген җитәкли.
Ул - әдәби иҗатын тулысынча балалар шигъриятенә багышлаган каләм иясе. 1994 елда аның «Антенналы бәрәңге» дигән беренче шигъри җыентыгы дөнья күрә һәм китап укучылар арасында үткәрелгән «1994 ел китабы» бәйгесендә икенче урынны яулый. Хәзер шагыйрә - балалар күңеленә хуш килгән алты китап авторы. Аның балалар психологиясен нечкә тоеп, дөньяны тану-кабул итүдә бала аңындагы аерым үзенчәлекләрне аңлап-белеп, үз күңеле аша уздырып, йөгерек тел белән язган шигырьләрендә юмор да, гыйбрәт тә, моңсулык та табигый рәвештә бергә үрелеп бара.
Шагыйрә 2002 елда республика журналистларының «Бәллүр каләм» бүләгенә, ә 2004 елда балалар әдәбиятындагы хезмәтләре һәм «Колаклы коймаклар» китабы өчен Татарстан Язучылар берлегенең А.Алиш исемендәге бүләгенә лаек булды. 1995 елдан Татарстан Язучылар берлеге әгъзасы. Татарстан Республикасының Атказанган сәнгать эшлеклесе.
Аның турында Татарстанның халык шагыйре Роберт Миңнуллин: “Йолдыз - күңеле белән, фикер йөртүе белән чын балалар шагыйре. Аңа балаларча уйлый белү, моңсулана белү хас. Шуңа күрә дә шигырьләре табигый, балаларның үзләренчә килеп чыга. Ул балалар арасына бик тиз керә белә. Шигырьләрендә балалар тормышына гына хас вакыйгалар, сөйләшүләр, бәхәсләр тудыра. Аның нәни геройлары тапкыр да, шаян да, шул ук вакытта моңсу да. Алар бернинди ситуациядә дә югалып калмый торган, һәр сорауга җавап таба торган малайлар, кызлар. Алар — гаҗәпләнә, соклана, эзләнә, таба торган тиктормаслар. Аларның әле чын мәгънәсендә беркатлы сабый чаклары”, - дип язган.
Чыганак: http://tat.tatar-inform.ru