Татар мәгарифе порталы
Сез монда
Бүген “эшлекле дүшәмбе” киңәшмәсендә дәреслекләр, мөгаллимнәр белән тәэмин ителештә, биналарның техник әзерлегендә проблемалар юк, дип ышандырдылар.
Бүген Казан мәктәпләренең 105 меңгә якын укучысы өчен яңа уку елы башланды. Шуларның 11 меңе мәктәп бусагасын тәүге тапкыр атлап керүчеләр. Барлык беренче сыйныф укучысына мэрия бүләге - иллюстрацияле мәктәп укучысы энциклопедиясе тапшырыла. Бүген “Кояшлы шәһәр” микрорайонында заманча яңа мәктәп ишекләрен ача. 1 мең балага исәпләнгән бу белем йорты республикада аэрокосмик юнәлештәге беренче мәктәп булачак.
Башкала мәктәпләренең барысы да укучыларны кабул итәргә әзер. Җәйге чорда 19 мәктәптә капиталь ремонт уздырылган, 272 мәгариф учреждениесендә агымдагы төзекләндерү эшләре башкарылган, шулай ук җылыту, канализация системалары төзекләндерелгән, гомумтөзелеш эшләре башкарылган. Бу эшләргә “Туган мәктәбеңә ярдәм ит!” республика акциясендә катнашучылар һәм ата-аналар да зур өлеш керткән.
“Ремонт эшләреннән соң кайбер җитешсезлекләр калган иде, ләкин алар җитди түгел һәм уку процессына комачаулык итми.. Бу җитешсезлекләр аерым график буенча ял көннәрендә төзәтеләчәк”, - дип белдерде Казан шәһәре Башкарма комитетының мәгариф идарәсе җитәкчесе Илсур Һадиуллин. Ул бүген Казан җитәкчелегенең мэр Илсур Метшин рәислегендә узган “эшлекле дүшәмбе” киңәшмәсендә башкала мәктәпләренең яңа уку елын башлап җибәрүгә әзерлеге хакында хисап тотты.
Аның сүзләренә караганда, бүген барлык гомумбелем бирү мәктәпләре сак сигнализациясе төймәсе, янгынга каршы автоматлаштырылган сигнализация белән җиһазландырылган. 57 мәктәпкә видеокүзәтү системасы урнаштырылган, 28 мәктәп турникет белән җиһазландырылган. Барлык уку йортлары Роспотребнадзор һәм Дәүләт янгын күзәтечлеге органнары тарафыннан кабул итеп алынган.
Яңа уку елын уңышлы башлап җибәрү өчен, мәктәпләрнең техник әзерлеге генә түгел, мөгаллимнәр белән тиешенчә тәэмин ителүе дә зарур. Илсур Һадиуллин укытучыларның хезмәт хакларын күтәрүнең башкалада мөгаллимнәр кытлыгын шактыйга киметүен ассызыклады. Бүгенгә бары 38 укытучы урыны буш кала. 14 укытучы башлангыч сыйныфларга таләп ителә, шулай ук математика һәм физика укытучыларына сорау кала. Мәгариф идарәсе җитәкчесе Илсур Һадиуллин бу атна эчендә әлеге мәсьәләгә чишелеш табарга ышандырды. Буш эш урыннары эчке ресурслар исәбенә тулыландырылачак. “Бу проблема түгел. Мәсьәләне укытучыларны бер мәктәптән икенчесенә күчерү юлы белән булса да хәл итәячәкбез”, - диде ул.
Илсур Һадиуллин бүген Казан мәктәпләрен дәреслекләр белән тәэмин итүдә дә проблемалар булмас, дип ышандыра. Мәгариф һәм фән министрлыгына бирелгән заявка бүген 62 процентка канәгатьләндерелгән.
Дәреслекләр мәктәпләргә кайтарылган. “Быелга соралган дәреслекләрнең барысы да кайтарылды, мәктәпләрнең ихтыяҗы канәгатьләндерелде. Киләсе уку елын истә тотып алданрак бирелгән заявкалар буенча дәреслекләрне министрлык бу ел ахырына кайтарырга ышандыра. Сораулар туа калганда, ТР Мәгариф һәм фән министрлыгы белән чишәчәкбез”, - ди ул. Мэр Илсур Метшин дәреслекләр белән тәэмин итүдә узган еллардагы хаталарны кабатламаска, бу мәсьәләне даими контрольдә тотарга, ана-аналар арасында аңлату эшләре алып барырга чакырды.
Илсур Һадиуллин мәктәп формалары белән тәэмин ителештә дә проблемалар булмавын ассызклады.
“Мәктәпкә җыенырга ярдәм ит!” республика хәйрия акциясе кысаларында быел Казанда 1,5 меңгә якын бала 2 млн сумнан артыклык мәктәп-кирәк яраклары белән тәэмин ителгән. Моннан тыш, авыр тормыш хәлендә калган гаиләләрдән 217 укучы 240 ар сумлык мәктәп комплектлары алган, биш һәм аннан күбрәк балалары булган гаиләләрдән 49 балага мәктәп формасы бүләк ителгән.
Илсур Һадиуллин ассызыклаганча, мәктәптә укучыларның сәламәт туклануын тәэмин итү төп бурыч булып кала. Аның сүзләренә караганда, Универсиададан соң, мәктәп ашханәләрендә технологик җиһазлар, мебельләр яңартылган. Аз тәэмин ителгән гаилә балаларын социаль яклау максатыннан, бу уку елында да түләүсез туклану оештырылачак.
Билгеле булганча, агымдагы елның 1 сентябреннән “РФ да мәгариф турында”гы яңа федераль закон гамәлгә керде. Аның нигезендә, хәзер мәктәпкәчә белем бирү гомуми белем бирү системасының беренче баскычы дип санала. Илсур Һадиуллин бу уку елында 5-6 сыйныфларда федераль дәүләт стандартларын кертүнең сынау режимында дәвам ителәчәген искәртте.
Мэр Илсур Метшин укучыларны, мөгаллимнәрне, ата-аналарны яңа уку елы белән котлап, аларга уңышлар, сәламәтлек теләде.
Чыганак: http://tat.tatar-inform.ru