Җәмгыятьтә шактый таралыш алган коррупция очраклары белән өлкәннәр генә түгел, мәктәп укучылары да яхшы таныш. Аларның “проблемаларны акча ярдәмендә хәл итү”гә карата фикере тискәре – алар киләчәктә гадел тормыш алып барырга тели.

7 май көнне Казан Кремлендә “Объективта - коррупция” бәйгесенә йомгак ясалды. Аның максаты – җәмгыятьтә әлеге күренешкә карата тискәре мөнәсәбәт булдыру. Видеороликлар бәйгесендә 14 яшьтән алып 35кә кадәрге яшьләр катнаша алса да, җиңү яулаучыларның күбесе мәктәп укучылары булды. Бактың исә, аларны бу конкурста катнашуга кыйммәтле бүләкләр оту теләге түгел, ә тирә-юньдә очрый торган ришвәтчелек очракларын киметү теләге этәргән икән.

- Мин 11нче сыйныфта укыйм. Шулай булуга да карамастан, коррупция очраклары белән мин дә әледән-әле очрашып торам. Минем үземнең беркайчан да ришвәт биргәнем юк, ә менә андый очракларның шаһиты булганым бар. Миңа калса, бу – җәмгыятьтәге иң ямьсез күренешләрнең берсе. Киләчәктә дә бу афәткә карата көрәшергә телим, - дип сөйләде безгә “Объективта - коррупция” бәйгесендә беренче урынны яулаган Чаллы шәһәрендә яшәүче Нияз Гайнуллин.

Ул дуслары Алексей Володин һәм Таисия Марченкова белән бергә хастаханәдәге ришвәтчелек очраклары турында видеоролик төшергән. Аның эчтәлеге исә менә болайрак. Ир белән хатын матур гына яшәп ята. Шунда ир кеше кинәт чирләп китә. Аңа ашыгыч рәвештә операция ясыйлар. Шунда ирне хастаханәгә салу өчен урын юклыгы ачыклана. Ләкин табиблар хатынга билгеле бер бәягә махсус урын табып бирергә вәгъдә итә. Соңыннан исә әлеге хастаханәнең яртылаш буш булуы, ә табибларның кеше кайгысында акча эшләргә омтылганлыгы билгеле була...

Бактың исә, бу роликны әзерләүчеләрнең берсе – КФУның Чаллыдагы филиалында, 2 курста белем алучы Алексей Володин – әлеге очрак белән шәхсән үзе очрашкан икән.

- Хастаханә һәм полиция идарәләрендә коррупция белән бәйле вәзгыять аеруча авыр. Мин моны үземнең шәхси тәҗрибәмнән чыгып әйтәм. Шуңа күрә видеоролик өчен нәкъ менә шушы идеяне сайладык та инде, - дип белдерде ул.

Әйтергә кирәк, чара быел беренче мәртәбә генә уздырылган. Анда Татарстанның шәһәр һәм авылларыннан барлыгы 178 кеше катнашкан. Конкурска тәкъдим ителгән эшләрнең гомуми саны исә – 50дән артык.

- Бу бәйгене үткәрү юкка түгел. Хәзерге вакытта Татарстан хакимияте коррупциягә каршы актив көрәш алып бара. Алга китеш тә бар. Шулай булуга да кармастан, бу мәсьәләне җәмгыять ярдәменнән башка хәл итеп булмаячак. Ришвәтчелек белән көрәштә безгә сезнең ярдәм бик кирәк, - дип мөрәҗәгать итте конкурста җиңүчеләргә Татарстан Президентының коррупциягә каршы сәясәт мәсьәләләре идарәсенең оештыру бүлеге җитәкчесе Алексей Панкратов.

Чара ахырында җиңүчеләрнең барысына да дипломнар һәм кыйммәтле бүләкләр тапшырылды.

Чыганак: http://intertat.ru/tt