Татар мәгарифе порталы
Сез монда
Хөрмәтле кулланучыларыбыз!
Сезне "Әдәби җәүһәрләр" бәйгесенең икенче викторинасы җиңүчеләре белән таныштырырга телибез.
Бәйгенең октябрь аенда үткәрелгән икенче викторинасы татар шагыйрәсе һәм җәмәгать эшлеклесе Заһидә Бурнашевага багышланган иде. Аның тууына күптән түгел 120 ел булды. Әмма, татар дөньясы тарихында әһәмиятле роль уйнаган әлеге ханымның иҗаты, тормыш юлы белән без бүгенге көндә никадәр таныш? Октябрь аеның соңгы көнендә үткәрелгән әлеге викторина нәкъ менә шушы сорауга җавап алырга тырышты.
Икенче викторинада, атнаның ял көне булуына карамастан, шактый кеше катнашты. Викторинага әзерлек тә бу юлы күпкә югары иде. 40% барьерны бары тик өч кенә кеше үтә алмады. Ә менә 17 кеше 50% тан артык балл җыя алды һәм әлеге уңышларын дәлилләп махсус электрон сертификат та сората ала!
Шунысы сөенечле, викторинада катнашып 5 (!) кеше 90% тан артык балл җыйды. Шуңа күрә дә, нәтиҗәләрне викторинаны узуга сарыф ителгән вакытка нигезләнеп ясыйбыз.
Викторинабызда III урын 12 минут 8 секундта 92% балл җыйган Кукмара районы Югары Арбаш гомуми урта белем бирү мәктәбенең I кв.категорияле татар теле һәм әдәбияты укытучысы Ленара Гибадуллинага, ә II урын 6 минут 22 секундта 92% балл җыйган Актаныш икенче санлы мәктәбе укучысы Айгизә Галләмовага тапшырыла. Алар инде икенче ай рәттән призерлар исемлегендә, әмма беренче урын белән аларны ай саен берничә балл аерып тора. Ике призер да бәйгенең финал турына чакырылалар һәм әлеге чарада махсус дипломнар һәм иганәчеләребез бүләкләрен алырлар, дип ышанып калабыз! Бәлки, киләсе викториналарыбызда аларга бәхет елмаер һәм бәйгенең финал турында җиңүче ролендә катнаша алырлар?!
Шундый ук нәтиҗәгә тагын Минзәлә шәһәре икенче санлы мәктәбенең татар теле һәм әдәбияты укытучысы Хамаева Гөлфинә һәм Биектау районы Айбаш урта мәктәбе китапханәчесе Рахманова Гүзәл ирештеләр, әмма әлеге нәтиҗәгә (92%) ирешү өчен аларга күбрәк вакыт сарыф итәргә туры килде.
Инде җиңүче белән таныштырыр вакыт җитте! 100% җыю өчен әлеге кулланучыбызга нибары тагын бер сорауга гына тулысынча дөрес җавап бирергә кирәк иде. 96% нәтиҗә белән бәйгебезнең икенче викторинасында Зәй районы Кадер урта мәктәбе филиалы Бура-Киртә төп мәктәбенең татар теле һәм әдәбияты укытучысы Айгөл Нәбиуллина җиңү яулады! Сорауларга җавап бирү өчен аңа нибары 5 минут 40 секунд вакыт кирәк булган.
Айгөл ханымны апрель аенда узачак финал турына көтеп калабыз. Финал турында ул үзенең белемнәрен тагын бер кат дәлилләр, дип ышанабыз!
Хөрмәтле татар әдәбиятын сөючеләр!
Дүшәмбе көнне (2 ноябрь) сезгә ноябрь ае әдибен тәкъдим итәчәкбез. Ноябрь ае дәвамында әлеге әдипнең тормыш юлы, иҗаты белән танышырга кирәк булачак, ә айның соңгы көнендә (30 ноябрь) чираттагы викторина яңа җиңүчеләрне билгеләр.
Татар әдәбияты, татар классиклары әсәрләре, мәшһүр әдипләребезнең тормыш юлы һәм иҗаты белән кызыксынып яшәгез! Татар әдәбияты ул бик бай һәм хөрмәткә лаек!
Сезне көн дә порталыбызда көтеп калабыз, безнең яңалыклардан хәбәрдар булып торыгыз!
Ихтирам белән, Татнетны үстерү фонды директоры, Белем.ру порталы җитәкчесе Раил Гатауллин