Татар мәгарифе порталы
15 март көнне балалар арасында уздырыла торган “Глаголица” III бәйсез әдәби премиясенә иҗат әсәрләре кабул ителә башлады. Бүләкләр дә бик саллы күренә.
Чараны ТР Мәдәният министрлыгы, Язучылар Берлеге һәм “Татмедиа” мәгълүмат агентлыгы белән “Счастливые истории” балалар хәйрия фонды оештыра. Бу хакта “Татмедиа” агентлыгында узган матбугат очрашуында сөйләнелде.
Бәйге балалар һәм үсмерләрнең иҗатын үстерү, белемен арттыру максатыннан оештырыла. Анда ун яшьтән алып унҗиде яшькә кадәрле үсмерләр катнаша ала. Моңарчы чара Татарстан күләмендә генә уздырылса, быелдан аның географиясен киңәйтергә карар кылганнар. Хәзер инде Русия буенча, хәтта СНГ илләрендә яшәп, татар яки урыс телендә язган балалар-үсмерләр эшләрен җибәрә ала. Аларның иҗат җимешләрен мәртәбәле жюри караячак.
Эшләр “урыс телендә проза”, “урыс телендә поэзия”, “урыс телендә эссе”, “татар телендә проза”, “татар телендә поэзия” һәм “татар, француз, инглиз, немецчәдән урысчага тәрҗемә” кебек номанацияләрдә билгеләнә. Һәркайсында игътибарга лаеклы өчәр эш сайлап алыначак. Ә инде иң үзенчәлекле әсәр авторына “Глаголица” премиясенең символы булган “Бәллүр ябалак” тапшырылачак. Бүләкләр дә бик саллы күренә: планшет, Русиянең һәм Татарстанның танылган язучылары үткәргән мастер-классларда катнашу өчен сертификатлар, “Малая библиотека” китаплар җыелмасы һ.б. Моннан тыш, номинация ияләренең хезмәтләре журнал-альманахларда басылып, киң җәмәгатьчелек игътибарына да тәкъдим ителәчәк.
“Глаголица” премиясе турында тулырак мәгълүматны httр://pwww.glagolitsa-rt.ru/ сайтыннан алып була.