Бүген, 26 апрельдә, бөек татар шагыйре, әдәби тәнкыйтьче, публицист, җәмәгать эшлеклесе һәм тәрҗемәче  Габдулла Мөхәммәтгариф улы Тукаевның (26 апрель 1886 - 15 апрель 1913) тууына 130 ел тулды. Шул уңайдан күп төбәкләрдә чаралар үткәрелә.

Казанда иртәнге сәгать 9да Тукай скверында Габдулла Тукай һәйкәленә җитәкчелек һәм җәмәгатьчелек катнашында чәчәк салу тантанасы була.

Ә иртәнге сәгать 10да Островский урамы, 10 адресы буенча урнашкан Яшь тамашачы театры бинасына Г.Тукайга мемориаль такта кую тантанасы үткәрелә. Бераз соңрак – 11:00 сәгатьтә Шигърият бәйрәме башлана. Әлеге традицион чара М.Җәлил исемендәге Татар дәүләт опера һәм балет академия театры янындагы Тукай һәйкәле янында уздырыла.

Төштән соң М.Җәлил исемендәге Татар дәүләт опера һәм балет академия театрында Туган тел көненә һәм Габдулла Тукайның тууына 130 ел тулуга багышланган тантана оештырыла.