Шушы көннәрдә Казанның Яңа-Савин районы 165нче мәктәбе укытучысы Төньяк Осетиядән җиңү алып кайтты. 11-15нче ноябрьдә Владикавказда “Кешене тәрбияләү” исемле гомумбелем бирү оешмалары хезмәткәрләре Россиякүләм һөнәри конкурсының соңгы этабы узды. Биредә математика укытучысы Инесса Сабирова “Гомумбелем оешмасы сыйныф җитәкчесе” номинациясендә 4 урынга һәм Төньяк Осетия – Алания Республикасының Мәгариф һәм фән министрлыгы оештырган махсус призга лаек булган, дип хәбәр итә республикабыз Мәгариф һәм фән министрлыгы. Инесса Евгеньевна агымдагы елның мартында республикакүләм “Ел сыйныф җитәкчесе” бәйгесендә абсолют җиңүче булган иде.

Владикавказда ярыш балалар йорты, мәктәп-интернат (шул исәптән кадет мәктәпләр), балалар сәламәтләндерү оешмасы, озайтылган көн группасы тәрбиячеләре, гомумбелем бирү оешмасы сыйныф җитәкчесе, тәрбия эше буенча директор урынбасары, социаль педагог, өлкән әйдаман кебек номинацияләр буенча барган. Һөнәри осталыкларын Россиянең 40 регионыннан педагоглар күрсәткән.