Питрәчнең 2 нче урта гомуми белем бирү мәктәбендә Украинадагы хәрби операциядә катнашып һәлак булган майор Кравчин Сергей Иванович истәлегенә шахмат-шашка турниры узды. Турнирга 1-11 нче сыйныф укучылары гына түгел, балалар бакчасына йөрүче сабыйлар да кушылды. 60 лап бала катнашында узган турнир С. Кравчин истәлегенә ачылган мемориаль такта янында бер минутлык тынлык белән башланып китте. Чараны ачу тантанасына район башлыгы Илһам Миңнехан улы Кашапов, район мәгариф идарәсе башлыгы Марина Алексеевна Харитонова һәм Сергей Кравчинның хатыны Дарья Вадимовна чакырулы иде.

…Халык хәтерендә сакланганда каһарманнар үлми дибез. Бу чыннан да шулай. Районда шундый ук турнирлар хәрби бурычларын үтәгәндә һәлак булган Сергей Харламов, Вячеслав Казаковлар истәлегенә багышлап Питрәчнең 1 нче һәм Пановка мәктәпләрендә дә узды.