Бу уку елында Казанның азык-төлек һәм социаль туклану департаменты шәһәрнең 160 мең укучысын кайнар баланслы туклану белән тәэмин итә, бу узган ел белән чагыштырганда 9 меңгә күбрәк. 1-4 нче сыйныф укучыларының 100% бушлай кайнар ризык ала. Бу хакта эшлекле дүшәмбедә Башкарма комитетта Казанның азык-төлек һәм социаль туклану департаменты генераль директоры Рима Мөхәммәдшина сөйләде.

«Мәктәп укучылары санының 9 меңгә артуы – һичшиксез, бик зур сан, – диде шәһәр Мэры Илсур Метшин. – Татарстан Республикасында халык саны 10 меңнән артып киткән районнар бар. Ә без 9 мең укучыга үстек. Соңгы 10 ел эчендә саннарда аз аерма белән ел саен шулай артабыз. Без эшне дөрес төзергә, фаразларга, анализларга һәм уку елы башына укучылар агымына әзерләнергә өйрәндек. Һәркемне укыту программасы белән тәэмин итеп кенә калмыйча, ашатырга да кирәк».

78 нче һәм 159 нчы лицейларда, 102 нче гимназияләрдә «Предзаказ» системасын сынап карыйлар. Рима Мөхәммәдшина сүзләренчә, укучылар өчен 4 меню комплексы бар, аларның бәясе 2021 елның апреленнән артмаган. Иртәнге яки көндезге ашны 30 сумга сатып алырга мөмкин. Сайлау өчен 48 сумга 2 комплекслы төшке аш варианты тәкъдим ителә. Ирекле сайлау менюсы укучылар өчен 73 сумга тәкъдим ителә.

«Барлык теләкләр дә теркәлде һәм эшләнә башлады. Балалары ремонт эшләре үткән ашханәләргә йөргән ата-аналар зур рәхмәт сүзләре белән бәяләмәләр калдыралар һәм төшке аш залының эчке ягы яңару белән мәктәп укучыларының аппетиты яхшыруын билгеләп үтәләр», - диде Рима Мөхәммәдшина.