"Урмай моңы" Халыкара татар җыры фестиваленең беренче туры старт алды
Яңа ел әле башланырга да өлгермәде, "Урмай моңы" Халыкара татар җыры фестиваленең беренче туры инде башланып та китте. Бу турыда Урмай авылының сайты хәбәр итә. Дөньякүләм аренага чыккан әлеге бәйгенең беренче турында 2012 елның 10 февраленә кадәр катнашырга мөмкин. Бәйгенең әлеге туры дистанцион рәвештә үткәрелә.
Бәйгедә катнашып уңышка ирешү өчен татар эстрадасы җырларын яхшы итеп башкара белү сорала. 10 яшьтән алып 17 яшькәчә укучы балалар өчен бер номинация булса, 17-30 яшьтәге башкаручылар өчен аерым номинация каралган. Һәр катнашучы 2-3 эстрада җырын башкарып күрсәтергә тиеш булачак.
Шунысын да билгеләп үтәргә кирәк - бәйге быел егерме бишенче тапкыр үткәрелә!!! Шундый зур бәйгенең җиңүчеләре белән 24-26 февраль көннәрендә таныша алырсыз.
Бәйге турында тулырак мәгълүмат алу өчен http://urmai-urmaevo.ucoz.ru сайтына керергә чакырабыз.
Катнашучыларның барысына да уңышлар теләп калабыз!