VII сыйныф

УРЫСЧА КҮП СҮЗЕҢ...

Автор: 
Дәрдемәнд

Урысча күп сүзең, азы татарча,

Белалмыйм, кем син — урысмы, татармы?

Ничектер белмәдек исме шәрифең:

Хәсәнме, юкса Иванмы, Макармы?..

ӘБҮГАЛИСИНӘ КЫЙССАСЫ

Автор: 
Каюм Насыйри

«Әбүгалисина китабы» дип мәгьруф «Кәнҗинәи хикмәт» исемле китапның мосаннифы әйтәдер: ошбу китапны тасниф итмәгә вә язмага сәбәп вә багыйс ошбудыр ки, бу фәкыйрь вә хәкыйр Зыятдин Сәед Яхъя, ничә мәгърифәт иясе адәмнәр белән күрешеп, дәрес арасында Әбүгалисина хакында ничә гаҗаеп хикәятләр вә гараип риваятьләр ишетеп вә тыңлап утырган заманда: «Әбүгалисина кыйссасын үз алдына бер китап итеп язсам икән», — дип, һәрзаман күңелемә килер иде.

КУАНДЫ ИЛ...

Автор: 
Дәрдемәнд

Куанды ил, канат какты мәләкләр,
Шашып, аң-таң булып шайтан төкерде!..
Җитәр, җилкенмә, йолкынма, күңел, син,
Кияү булсаң да, ул туйга түгел син!
 

РӘСЕМ

Автор: 
Дәрдемәнд

Тәнкәен ак, түшкәйләрен киң яраткан,

Биткәенең иң очында миң яраткан;

Саклар өчен зифа буен яман күздән,

Чәчкәйләрен аяк белән тиң яраткан!

ВИДАГЪ

Автор: 
Дәрдемәнд

Тәгәрәп-уйнап

Буй үскән

Туган илем, исән бул!

Чәч кузгатып

Җай искән

Таңгы җилем, исән бул!

КАРАБ

Автор: 
Дәрдемәнд

Шаулый диңгез...

Җил өрәдер...

Җилкәнен киргән караб!

Төн вә көндез

Ул йөрәдер:

Юл бара ят ил карап...

ҖӘЙ ҮТТЕ...

Автор: 
Дәрдемәнд

Кар-яңгырлы көз урнашты,

Күк тугайның баурына боз урнашты.

Гөл кипте,

Сабагында кинә калды.

Былбыл!

Сиңа бер бөртек инә калды.

СҮЗЛЕК:

Кинә – ачу, үч.

ТАТАР ХАЛЫК МӘКАЛЬЛӘРЕ

  • Ерак кардәштән тату күрше яхшы.
  • Келәм сатсаң, күршеңә сат; бер читендә үзең утырырсың.
  • Күршеңнең үрдәгенә тисәң, казыңның аягыннан тотып тор.
  • Үзеңнең кем икәнеңне беләсең килсә, күршеңнән сора.
  • Күрше тавыгы каз кебек, йомыркасы баш кебек.

 

КӘҖҮЛ ЧИТЕК

Автор: 
Гаяз Исхакый

- Минем әти бүген Казаннан кайта. Улмы? Ул миңа санлы калач китерә. Аннары миңа читек китерә. Өр-яңа читек.

Аның саурысы синең апаңның намазлык чигә торган үрнәге кебек чәчәкле була.

Аның олтаны болгар олтаны, кырыеннан киселгән. Ярып ук киселгән. Үзе кып-кызыл төсле. Кура җиләге тесле кызыл түгел, зияб (зяблик, кызыл түш) төсле кызыл.

Аның балтыры шадраланып тора, чем-кара.

Миңа әти кәҗүл читек китерә...

Иртәгә гаеткә мин кәҗүл читек киеп барам.

Беләмсең, Миңнегали?

RSS-материал