Украинаның Милли фәннәр академиясе академигы Валерий Кухарь лауреат булды.

Бүген Казанда КФУның актлар залында фосфорорганик химия өлкәсендә Халыкара Арбузов премиясен Украинаның Милли фәннәр академиясе академигы Валерий Кухарьга тапшыру тантанасы булды.
Чарада ТР Премьер-министры урынбасары – ТР мәгариф һәм фән министры Энгель Фәттахов, ТР Фәннәр академиясе президенты Әхмәт Мәзһәров, Россия Фәннәр академиясенең Казан фәнни үзәгенең А.Е.Арбузов исемендәге Органик һәм физик химия институты директоры, Россия Фәннәр академиясенең Казан фәнни үзәге рәисе Олег Синяшин, АКШнан профессор Девид Льюис катнашты.

Университет ректоры Илшат Гафуров җыелганнарга сәламләү сүзе белән мөрәҗәгать итте. Ул соңгы елларда вузның уңышлары турында сөйләде, Казан химиклар мәктәбе казанышларын билгеләп үтте.
“Халыкара Арбузов премиясенә нигез салынганнан алып, Россиядән, АКШ, Япониядән, Польшадан, Франциядән, Германиядән һәм Бөек Британиядән 9 кеше лауреат булды. Быел Украинадан вәкил премиягә лаек булды”, - дип билгеләде И.Гафуров.

Соңыннан “Академик Б.А. Арбузовның тормышы һәм эшчәнлеге” темасына доклад белән Россия Фәннәр академиясе академигы Александр Коновалов чыгыш ясады. Быел Борис Арбузовның тууына 110 ел була.
Кунакларны һәм чарада катнашучыларны ТР җитәкчелеге исеменнән ТР мәгариф һәм фән министры Энгель Фәттахов сәламләде.

“Безнең бөек ватандашыбызга багышланган дистанцион мәйданчык кысаларында КФУ залында җыелуыбыз бик символик, - диде ул. – Татарстан – нефть химиясе сәнәгате көчле үсә торган төбәк. Безнең өчен әлеге өлкәдә тикшеренүләр, ачышлар бик мөһим”.

Ул чыгышы соңында Халыкара Арбузов премиясен Украинаның Милли фәннәр академиясе академигы Валерий Кухарьга тапшырды.

Алга таба академикны котлау сүзләре белән ТР Фәннәр академиясе президенты Әхмәт Мәзһәров чыгыш ясады. Ул аңа ТР Фәннәр академиясе президиумы исеменнән уңышлар һәм Казан химиклар мәктәбе белән тыгыз хезмәттәшлектә булуны теләде.

“Дөресен генә әйткәндә, мин моны көтмәдем, - диде В.Кухарь. – Минем өчен премия лауреаты булу бик зур шатлык”. Ул ТР Президенты Рөстәм Миңнехановка рәхмәт сүзләрен белдерде.

Чыганак: http://tat.tatar-inform.ru