Татар мәгарифе порталы
Сез монда
24-25 ноябрь көннәрендә Рөстәм Бикмуллин исемендәге XII Республикакүләм җыр һәм шигърият фестивале үтте. Беренче көнне сайлап алу туры узса, 25е фестивальнең гала-концерты булды. Әлеге чара 2002 елдан бирле оештырыла.
Быел фестивальнең исемен кыскартып, аны “Бика фест” дип атаганнар. Рөстәм Бикмуллинны яратып “Бикә” дип тә йөртә торган булганнар икшн. Фестивальнең яңа исеме шуннан килеп чыккан.
Чарада барлыгы 200гә якын егет-кыз җиде номинациядә көч сынашты. Алар “Эстрада җырын иң яхшы башкаручы”, “Халык җырын иң яхшы башкаручы”, “Автор-башкаручы”, “Иң яхшы коллектив”, “Үз әсәрен иң яхшы укучы”, “Башка автор әсәрен иң яхшы укучы” исемнәрен яуларга тырышты.
Аларга бәя бирүче кешеләр дә республикабызда билгеле шәхесләр. Татарстанның халык артисты Римма Ибраһимова фестивальнең жюри рәисе булды. Жюри составында шулай ук Татарстанның атказанган сәнгать эшлеклесе, композитор Риф Гатауллин, шагыйрә Йолдыз Миңнуллина, “Сәләт”тән калкып чыккан йолдызлар Илназ Сафиуллин, Ләйсән Әсхәтова, башкаручылар Илгиз Шәйхразиев, Гөлназ Батталова бар иде.
Кичәне яшьләр арасында танылырга өлгергән саксофонда уйнаучы егет Артур Mauzer Sax ачып җибәрде. Шуны әйтеп узарга кирәк: 2007 елда Артурларның гаилә ансамбле әлеге фестивальдә призлы урынга лаек була.
Фестивальнең гала-концертын “Сәләт” яшьләр оешмасының активистлары Альберт Шакиров һәм Айназ Гайниева алып барды. Быел оештыручылар яңалык өстәргә дә булган: тагын ике алып баручы - Алмаз Корбанов (D’Ali) белән Чулпан Фатыхова килеп кушылган. Әйтергә кирәк, аларның алып барулары, үзләре әйтмешли, заманча булса да, урыны-урыны белән бик күңелгә ятып бетмәде.
Кечкенә генә Энҗе Әхмәтҗанова үзе язган “Әни җылысы” дигән җыр башкарды. Әлеге кызчык “Бика-фест”та беренче тапкыр катнаша икән. “Мин әнине бик каты яратам, әниләр безгә якын кешеләр, шуңа аның турында җыр яздым”, – диде Энҗе. Ул җырның сүзләрен язгач, композитор Әлфия Һадиева аңа көй сала.
Тамашачы Булат Фәсахов сөйләгән Фатих Кәримнең “Кыңгыраулы яшел гармун” әсәреннән өзекне яратып тыңлады. Егетнең матур яңгырашлы тавышы да, солдат киемнәре дә тәэсир итми калмагандыр. “Автор-башкаручы” номинациясендә чыгыш ясаган Резедә Кәлимуллинаның “Верь мне” җырын тамашачы аеруча алкышлады. Шулай ук гала-концертта Yummy Music Band коллективының чыгышын да тамашачы җылы кабул итте. Зөлфия Камалованың чыгышы сюрпризларга бай иде. Җырчы сәхнәгә космик музыка ритмына чыкты, аның костюмы да космик символларга бай иде.
Җәүдәт Сөләйманов исә сәхнәгә күтәрелгәч: “Рөстәм Бикмуллин “Сәләт”нең якын дусты иде, – диде. – Ул вафат булгач, бездән соң килгән буыннар да аның турында белсен өчен, шушы фестивальне оештырырга булдык. Ничә еллар дәвамында балалар монда катнашып, дуслаша, зур бер Рөстәм Бикмуллин гаиләсе барлыкка килә”. Залда Рөстәм Бикмуллинның хатыны, дуслары да бар иде.
Чараның башкарма директоры Ислам Вәлиев әлеге фестивальнең гала-концертын оештырырга үзе тәкъдим итә. Нәтиҗәдә, 40 кешелек команда ике көнлек фестивальгә ике ай буе әзерләнә. Ислам Вәлиев – моңа кадәр күп кенә чараларны оештырган кеше. Алар арасында “Сәләт-Раушан” аланы лагере, “Студентлар язы”, “Беренче курслар көне” бәйгеләре бар.
Жюри рәисе Римма Ибраһимова концерт ахырында үз фикерләре белән уртаклашты. “Конкурслар хәзер бик күп, талантлылар да күп, – дип башлады ул сүзен. – Алар арасыннан бары тик өч кенә кешене сайлап алырга кирәк. Жюрида утыру бер дә җиңел эш түгел. Нәтиҗәне чыгарганда, башкалар белән дә киңәшеп, яшьләр сүзенә дә колак салып эш иттек. Уртак бер фикергә килү өчен бәхәсләшергә дә туры килде”, - диде ул.
Гала-концерт дәвамында катнашучыларга, җиңүчеләргә мактау сүзләре генә яңгыраса да, Римма ханым аларга әле бик күп эшләргә кирәклеген билгеләп үтте. “Камиллек конкурсларда бик сирәк очракларда гына була, – дип искәртте ул. – Мин тавыш ягыннан карыйм. Булган тавышың белән җырның эчтәлеген ачып бирү осталыгын күрсәтергә кирәк”. Аның татар халык җырларын башкарган, халык инструменталь оркестрга кушылып җырлаган яшьләрне күбрәк күрәсе килә икән. “Кыллы инструментлар – скрипка, мандолина, думбралар конкурска кире кайтса, бик яхшы булыр иде”, - дип искәртте ул үзенең чыгышында.
Чыганак: http://www.intertat.ru/tt