Дөресрәге, биредә ришвәтчелеккә каршы республика күләм оештырылып килүче иҗади конкурс җиңүчеләрен һәм номинатларын тәбрикләделәр.

Татарстанда бу бәйге инде өченче ел уздырыла. Быелгы җиңүчеләрне җыйган тантаналы чарада лауреатларны Татарстан Республикасы Премьер-министры урынбасары –мәгариф һәм фән министры Энгель Фәттәхов, Татарстан Президенты Аппараты җитәкчесе Әсгать Cәфәров, республика буенча баш федераль испектор Ренат Тимерҗанов котлады.

Кремльнең яшь кунакларын Президент исеменнән Әсгать Сәфәров сәламлады.

“Балалар кечкенә чактан ук әхлак нормаларын белеп тәрбияләнергә тиеш. Сезнең хезмәтләрегезне карап чыкканнан соң, андагы эчкерсезлек, фикер агышы, үткенлек күзгә ташланды. Һәрберсендә коррупциягә булган нәфрәтегез чагыла. Конкурска иҗади якын килә белгәнегез һәм битараф булмаганыгыз өчен олы рәхмәтебезне җиткерәсе килә. Коррупциягә каршы көрәштә сез дә үз өлешегезне кертәсез”, - дип, җәмгыятебездә тамыр җәйгән коррупциянең тискәре якларын санап узды ул. Бу юнәлештә дәүләт тә, кешеләр үзләре дә актив катнашырга тиеш, дип саный Сәфәров.

Агымдагы елның ноябрь-декабрь айларында Татарстан мәктәпләрендә ришвәткә каршы тематиканы алга сөргән 3 конкурс узды. V-XI сыйныф укучылары “Ил киләчәге – минем кулларда!” дигән темага инша язды (222 хезмәт). Милли мәктәпләр арасында үз туган телләрендә “Корруциягә - “Юк!” дибез” дигән темага инша язылды. Монда барлыгы 10 телдә 85 хезмәт алынган.

“Гадел яшәргә кирәк!” бәйгесендә балалар рәсемнәре ярышты. Быел бу конкурска 392 рәсем кабул ителгән. Хезмәтләр рәсем, коллаж, аппликация, плакат номинацияләрендә бәяләнде. Шулай ук быел студентлар арасында да “Коррупциягә каршы, закон сагында” конкурсы оештырылган иде.

Һәрбер иҗади хезмәт таләпчән жюри тарафыннан бәяләнде. Җәмгысе финалга 38 конкурсант узды. Җиңүче укучылар һәм аларның педагоглары Әлки, Алексеевски, Арча, Әлмәт, Балтач, Баулы, Буа, Бөгелмә, Зәй һәм башка районнардан килгән иде.

Ютазыдан килгән IV сыйныф укучысы Алия Ильясова “Гадел яшәргә кирәк!” конкурсында (I-IV сыйныф төркемендә) I урынга лаек дип табылды. Бәйгегә кыз “Я сама” дигән тирән мәгънәле рәсем тәкъдим иткән. “Минем рәсемдә бер кыз бала дөрес яшәп, Президент дәрәҗәсенә ирешкән. Иң беренче мин районда җиңдем. Менә хәзер республика буенча да җиңдең диделәр. Минем уйлавымча, һәрбер кеше гадел яшәргә тиеш, шул чагында гына кеше чын уңышларга ирешә ала”, - дип сөйләде Алия. Барлык җиңүчеләргә дә дипломнар һәм кыйммәтле бүләкләр, ә укытучыларга рәхмәт хатлары тапшырылды.

Теләсә нинди авыруны да дәвалап булган кебек, ришвәт алучы, кәкре куллардан да арынырга мөмкин дигән фикер яңгырады проект авторларыннан. Балаларны коррупциягә каршы көрәшкә җәлеп итү сәеррәк тоелса да, Казан Кремле диварларында урын алган рәсемнәр һәрбер түрә кабинетына эленсә, зыян итми калмас иде, анысы.

Чыганак: http://mon.tatarstan.ru/tat