Ана хакы, бала хакы төшенчәләрен бәян иткән спектакльгә режиссер Илдус Зиннуровның беренче тапкыр гына мөрәҗәгать итүе түгел. “Әкият” курчак театрында “Ана күзләре” япон әкиятенең премьерасы булып узды.

Спектакльне сәхнәгә театрның баш режиссеры, Россиянең һәм Татарстанның атказанган сәнгать эшлеклесе Илдус Зиннуров куйган. Моннан кырык ел диярлек элек куелган спектакльгә кабат мөрәҗәгать итүнең сәбәпләрен режиссер болай аңлата: “Яңа куелышта гаиләдәге мәхәббәт, ананың балага карата мәхәббәтенә басым ясала. Миңа калса, бүгенге көндә бу - бик актуаль тема”.

Әсәрнең инсценировкасын да Илдус ага эшләгән, рәссамы Валентина Губская, пластиканы Гүзәл Маннапова куйган. Куелыш шулай ук ут эффектлары белән дә баетылган. Сабыйлар әсәрнең идеясен мавыктыргыч тамаша аркылы сеңдерә.

Әкият- спектакльдә ана мәхәббәте, тормышның һәр минутында зур түземлек белән ана вазифаларын башкару, бала мәхәббәте, иргә тугрылык темалары күтәрелгән. Батырлык һәм ныклыкны яклаучы хикәят япон музыкасы белән баетылган. Беренче куелышта бердәнбер япон музыкасы тәлинкәсен әйләндерсәләр, бүген инде бу мәсьәләдә кытлык юк, ди әкиятчеләр.

Сюжет буенча вакыйгаларТау иясе тарафыннан Еланга әверелдерелгән Ана хакында. Ул үзенең башта бер күзен, аннары нәни улы белән ялгыз калган иренә, баланы тәрбияләргә булышу өчен, икенче күзен дә бирә...

Театрның яшь тамашачылары сәхнәдәге кеше зурлыгындагы курчакларны күреп сокландылар. Японнарның төсле, якты, милли киемнәре - кимонолары балалар тарафыннан югары бәяләнде. Курчакларны махсус япон технологиясе буенча ясаганнар. Бер геройны ике артист уйната.Татар телендә сөйләшүче япон курчаклары сабыйларны сакура чәчәк ата торган илгә сәяхәт иттерделәр. Төсле утлар, бай сәхнә бизәлеше, япон музыкасы, тенрәндергеч фабула замана балаларына да тәэсир итте. Хәер, сәнгать белгечләре бу спектакль, балалардан бигрәк, өлкәннәргә яки гаилә белән барып карау өчен отышлы, диделәр.

Әкияттәге яшь артистлар өчен “Ана күзләре” зур сынау һәм тәҗрибә булды. Авыр курчакларны японнарга хас салмак хәрәкәтләр белән йөртү, уйнатуны кайбер артистлар беренче тапкыр башкарды. Төп герой Сайоконы уйнаган Альбина Шагалиева: “Тамашачыны яраттырыр бу очракта ике мәртәбә артыграк көч куярга кирәк. Кара пәрәнҗә аша хис-тойгыларыңны курчакка, ә аның аша - залдагыларга тапшыра белү үзе бер сәнгать», - ди.

Беренче мәртәбә татар сәхнәсендә 1976 елда куелган “Ана күзләре” театр сөючеләрдә зур кызыксыну уяткан була. Озак еллар ул “Әкият” курчак театры репертуарын бизәп торган. Хәзер инде япон әкияте яңа куелышта, яңа тамашчыларны куандырыр. Әкият төбендә гыйбрәт бар, диләрме әле?

Чыганак: http://www.intertat.ru/tt