Хөрмәтле Белем.ру кулланучылары! Сезнең игътибарга Белем.ру порталына март аенда килгән һәм урнаштырылган яңа 19 ресурсны тәкъдим итәбез!

Исегезгә төшерәбез, бу елның башыннан без "Айның иң яхшы ресурсы" бәйге-акциясен башлап җибәрдек. Бу турыда әле беренче мәртәбә ишеткән кулланучылар өчен акциянең максатларын, акциядә катнашу тәртибен һәм аның нечкәлекләрен аңлатып китәбез.

Белем.ру порталы җитәкчелеге порталны мөмкин кадәр сыйфатлы ресурслар белән тәэмин итүне максат итеп куйганын сез беләсез инде. Сыйфатлы ресурслар күбрәк булган саен татар телендә сыйфатлырак белем ныграк биреләчәк, ә укытучыларның эшчәнлеге тагын да нәтиҗәлерәк булачак.

Порталга ресурсларны теләсә кайсы фән/предмет буенча юлларга мөмкин, ресурслар belem@belem.ru адресы буенча кабул ителә. Ресурслар татар телендә яисә татар телен өйрәтү максатларында булырга мөмкин. Ул тулысынча эшләнгән һәм тиешле дәрәҗәдә сыйфатлы, эчтәлекле булырга тиеш. Портал редакциясе һәр килгән ресурс белән танышып чыгып, аны яхшырту өстендә эш алып барса да (форматлау, хаталарын төзәтү һ.б.), яхшы эшкәртелеп юлланылган ресурсларга бәйге-акциядә катнашу өчен өстенлек күбрәк биреләчәк. Портал редакциясе килгән һәм урнаштырылган ресурслар арасыннан аеруча сыйфатлы дип саналган 10-15 ресурсны гына тавыш бирүгә куя. (! Бәйге-акциянең беренче айларында әлегә барлык хезмәтләрне дә тавыш бирү этабына керттек, тавыш бирү этабында катнашачак ресурслар санын арттырдык һәм катнашучыларның шансларын да арттырырга булдык. Айның соңгы көннәрендә юлланган ресурслар порталда киләсе айда гына урнаштырылырга һәм тавыш бирүдә катнашырга мөмкин. Шуңа күрә, бәйге-акциядә катнашырга теләгән ресурс авторлары хезмәтләрен вакытында тапшырырга тырышсыннар.)

Айның иң яхшы ресурсы өчен тавыш бирү аннан соң килгән айның беренче көннәрендә башлана (март ае өчен - апрельдә, ...) һәм төгәл 2 атна дәвам итә. Әлеге вакыт узганнан соң тавыш бирүдә катнашу мөмкинлеге ябыла, кулланучыларга бары тик нәтиҗәләр генә күрсәтелә.

Тавыш бирү барышында кулланучыларга ресурслар белән танышып чыгарга һәм аеруча яхшы дип исәпләнгән ресурс өчен тавыш бирергә кирәк. Тавыш бирү нәтиҗәләре системаның журналына язылып барыла һәм накрутка һ.б. шундый гадел булмаган очраклар тавыш бирү тәмамланганнан соң бетереләчәк.

"Айның иң яхшы ресурсы" бәйге-акциясе интернет челтәрендә татарча сыйфатлы ресурсларны арттыру максатыннан Татнетны үстерү фонды ярдәме белән оештырыла. Иң күп тавыш җыйган ресурс авторына "Татнетны үстерү фонды"ннан махсус бүләк тапшырыла (Март аеның иң яхшы дип табылган ресурсына Г.Камал исемендәге театр спектакленә 2 кешелек чакыру билеты. Бәйгенең әлегә бердәнбер һәм төп партнеры - Г.Камал исемендәге Татар дәүләт академия театры.)

Автор-җиңүче шулай ук Белем.ру порталы һәм Татнетны үстерү фондының махсус сертификаты белән бүләкләнә, әлеге сертификат авторның Белем.ру порталында халык ышанычын яулаган сыйфатлы ресурс урнаштыруын дәлилли.

"Айның иң яхшы ресурсы" исемен алган ресурс ел ахырында "Елның иң яхшы ресурсы" исемен алуга дәгъва кылачак.

Ресурс авторларына барысына да уңышлар теләп калабыз, тавыш бирүче кулланучыларның гаделлегенә өметләнәбез.

Март аеның иң яхшы ресурсы өчен http://belem.ru/best_03_14 адресы буенча күчеп тавыш бирергә мөмкин!