Татар мәгарифе порталы
Сез монда
Март аенда Татарстан халыклары Дуслык йорты сәхнәсендә чая, җор телле, сүзгә оста һәм, гомумән, иҗатка гашыйк балалар һәм яшьләр чыгышыннан торган кабатланмас чара узды. Бүген XI Республикакүләм «Дулкыннар» бәйгесенә нәтиҗә ясалды.
«Дулкыннар» бәйгесе Татарстан Республикасы һәм Россия төбәкләрендә яшәүче сәләтле балаларны һәм талантлы яшьләрне ачыклау, аларга ярдәм итү, иҗатта үз-үзләрен күрсәтү өчен шартлар тудыру максатыннан оештырыла. Милли мәдәниятне, гореф-гадәтләрне торгызу һәм популярлаштыруны алга сөрә. Бәйге Яшьләр эшләре һәм спорт министрлыгы һәм «Идел» яшьләр үзәге тарафыннан быел унберенче тапкыр уздырыла.
Үткән елларда бәйге Габдулла Тукай, Муса Җәлил, Гөлшат Зәйнашева, Фәнис Яруллин, Салих Сәйдәшев, Нәҗип Җиһанов, Мансур Мозаффаров, Фәрит Яруллин, Хәсән Туфан кебек татарның асыл шәхесләренә, Татарстан Республикасында Тарихи мирас елына багышланып үткәрелде, дип хәбәр итә проект авторлары. Быел конкурс шагыйрә, Г.Тукай бүләге лауреаты Клара Булатова иҗатына багышланган иде.
Быел конкурска 600дән артык гариза кабул ителгән. Бәйге конкурсантларына бәяне Татарстанның Халык артисты Миңгол Галиев, Татарстанның атказанган сәнгать эшлеклесе Әлфия Җаббарова, Татарстанның атказанган сәнгать эшлеклесе Мөнирә Хәбибуллина, «Татарстан - Яңа гасыр» телерадиокомпаниясе балалар һәм яшьләр тапшырулары иҗат берләшмәсе җитәкчесе Рамилә Сәхабетдинова, республиканың атказанган артисты Фәнис Кәлимуллин, Татарстанның атказанган артисты Флера Хәмитова кебек танылган шәхесләрдән торган жюри бирде.
Нәтиҗәләр белән "Идел" яшьләр үзәге сайтында таныша аласыз: http://idel.tatar.
PS. Исегезгә төшерәбез, I Россиякүләм "Әдәби җәүһәрләр" бәйгесенең дә март ае Клара Булатовага багышланган. Март аеның соңгы көнендә Белем.ру порталында Клара ханымга багышланган викторина үткәреләчәк. Әлеге викторинага порталыбызның Ресурслар бүлегенә кереп әзерләнергә мөмкин.