12 мартта "Яндекс" тарафыннан оештырылган математика фәне буенча контроль эштә катнашкан Казан халкының 42 %ы "икеле" билгесе алган.

Контроль эш ун биремнән торган. Шуның тугызына дөрес җавап бирүчеләргә "бишле" куелган. Ә андыйлар Казанда 8 %ны тәшкил иткән. Биремне яхшы билгесенә чишүчеләр – 16 % булса, катнашучыларның якынча өчтән бере "өчле" билгесенә лаек булган.

Биремнәрне чишү өчен 1 сәгать вакыт бирелсә дә, күпчелек катнашучы эшне 35 минутта ук төгәлләгән.

Россия шәһәрләре арасында иң яхшы нәтиҗәләргә Калининград, Төмән, Владивостокта яшәүчеләр ирешкән. Аларда 45 %тан артык катнашучы "дүртле" яисә "бишле" билгесенә лаек булган. Казан күрсәткече уртачадан түбәнрәк – "дүртле" яисә "бишле" билгесе 24 % катнашучыга гына куелган.