"Татар теленнән контроль эш әлегә сыйфатсыз проект булып чыкты". Кызганыч, нәкъ менә шулай дип уйларга кала.

Бер-ике атна элек без кулланучыларыбызга "23 апрель көнне татар теле һәм әдәбияты буенча дөньякүләм контроль эш була", дип хәбәр иткән идек. Һәм соңгы көннәрдә әлеге контроль эш белән бәйле күп кенә тискәре хатлар кабул итәргә туры килде.

Проблема - әлеге проектның сыйфатында. Яңалыкны куяр алдыннан без дә әлеге сайт битенә кереп таныштык һәм андагы хаталарны күреп борчылдык. Тиз арада авторларын эзләп табып, аларга хаталар барлыгын хәбәр иттек. Кызганыч, хаталар төзәтелмәде генә түгел, киресенчә, текст тагын да хаталырак булып дөнья күрде.

Бу турыда кулланучыларыбыз безгә болай язалар:

• "Slm! Min tattest.ru da 12 xata tapqach alarga xat yazdim. Alar minnan tatar telena dores tarcema soradilar. Shunnan xatalarni tozattelar. Annari qarasam tagin telasa narsa yazip chiqtilar xatalar cibarep. Test utkanda tagin kup xatalar kurdem test biremnare echenda. Axirda sertifikat urischa chiqti ham minem isemdage tatar xareflare botenlay bozilip chiqqan.....".
• "Миңа бәби туен хәтерләтте бу хәл. Бишеге сатып алынган, чүпрәк-күлмәкләре әзер, кунаклар җыелган, ә бәбәй кайда? Ул тумаган! Монда да шулай: сыйфатлы дөрес татар теле юк, ә "контроль эш", "бердәм" йә "тоталь диктант" бар.

  Баштан хәтта "әдәбиятЕ" итеп язган булдылар - hәм бу кешеләр татар телен тикшерергә җыенганмы????"

Кулланучыларыбыздан шундый сыйфатсыз проектны рекламалавыбыз өчен гафу үтенәбез. Киләчәктә татар теле белән бәйле проектларның сыйфатлы булып дөнья күрүләрен теләп калабыз!