Татар мәгарифе порталы
Сез монда
Хөрмәтле кулланучылар!
Сезне уку елы тәмамлану һәм җәйге каникуллар башлану белән чын күңелдән котлыйбыз! Инде киләсе уку елына керер алдыннан көч җыярга, сәламәтлекне ныгытырга, гомумән, ял итәргә кирәк. Ә без, узган уку елында сезнең өчен ниләр эшли алдык, шулар белән уртаклашырбыз.
Эшләгән эшләр шактый. Әлеге эшләрне күп санлы иганәчеләр, дуслар, теләктәшлек белдергән яхшы кешеләр белән бергә матур итеп башкарып чыга алдык. Зур рәхмәт аларга.
2015-2016 елларда без үткәргән чаралар һәм проектлар:
1. "Айның иң яхшы ресурсы" бәйге-акциясе. Әлеге акция кысаларында без татар телендә язылган файдалы электрон ресурсларны популярлаштыру, халыкка таныту эшләрен алып барабыз. Һәр ай саен җиңүче авторлар Белем.ру порталы сертификаты һәм бәйгенең иганәчесе Г.Камал исемендәге татар дәүләт академия театрыннан ике кешелек чакыру билеты белән бүләкләнә. Белем.ру порталында ресурс урнаштырган һәркем бу турыда сертификат сората ала. Ресурслар җәй айларында да кабул ителеп урнаштырылачаклар.
2. "Белем җәүһәрләре" дөньякүләм файдалы татар интернет-проектлары бәйгесе. Бәйге 2010 елдан бирле даими ел саен үткәрелеп килә. Төп оештыручылары - ТР Мәгариф һәм фән министрлыгы, ТР Мәдәният министрлыгы, Татнетны үстерү фонды. Бәйге дөнья күләмендә үткәрелә, максаты - интернет челтәрендә татар телендә эшләп килә торган сыйфатлы татар сайтлары санын арттыру. Хәзерге вакытта VII Дөньякүләм бәйгегә гаризалар кабул итү бара (!). Бәйгедә катнашу өчен теркәлеп яисә авторизация үтеп керергә һәм Катнашу төймәсенә басып гариза тапшырырга кирәк. Бәйгенең нигезләмәсе: http://konkurs.belem.ru/nigezlama.
3. "Яшь татнетчылар" республикакүләм интернет-проектлар бәйгесе. Бәйге республика күләмендә быел икенче мәртәбә үткәрелде. Конкурста республиканың I-IX сыйныф укучылары үзләре ясаган татар сайтлары белән катнаша алалар. Бәйгедә җиңгән укучылар "Белем җәүһәрләре" бәйгесендә катнашырга тәкъдим ителәләр.
4. "Әдәби җәүһәрләр" россиякүләм татар әдәбиятын сөючеләр бәйгесе. 2015/16 уку елында бәйге беренче мәртәбә үткәрелде. Җиде ай (сентябрь-март) дәвамында җиде татар шәхесенең тормыш юлы һәм иҗаты тирәнтен өйрәнелде. Һәрбер ай викторина белән тәмамланды, һәрбер айның җиңүчеләре билгеләнде. Бәйгенең финал туры Габдулла Тукай туган Кушлавыч авылында үткәрелде. Бәйгенең финалы быел Татнетны үстерү фонды, Татарстан Язучылар берлеге һәм ТР Арча муниципаль районы Хакимияте белән берлектә үткәрелде, җиңүчеләрне бүләкләүдә "Таттелеком" компаниясе һәм Г.Камал исемендәге Татар дәүләт академия театрының зур ярдәмен сиздек. Бәйге барышында берничә йөз кешедә татар әдәбиятына һәм татар шәхесләренә (Таҗи Гыйззәт, Заһидә Бурнашева, Илдар Ханов, Хәсән Туфан, Фатих Әмирхан, Муса Җәлил, Клара Булатова) зур кызыксыну уяттык, әлеге өлкәдә белемнәрен ныгыта алдык. Әлеге бәйге тәмам булса да, викториналарда хәзер дә катнашырга һәм сертификат соратырга мөмкин.
5. "Әкияттә кунакта" Россиякүләм видео мастер-класслар бәйгесе. Әлеге бәйгене Татнетны үстерү фонды ТР Арча муниципаль районы Башкарма комитеты, Арча районы Мәгариф идарәсе һәм Кушлавыч төп гомумбелем мәктәбе белән берлектә Г.Тукайның тууына 130 ел тулуга багышлап үткәрде. Бәйгедә 5 яшьтән алып 17 яшькә кадәр балалар катнашты. Бәйгенең нәтиҗәләре: http://qushlawich.ru/node/661.
6. "Ул көннәрнең даны онытылмас" видеочыгышлар бәйгесе. Бәйге 2015 елда Бөтендөнья татар конгрессының Казан иҗтимагый оешмасы, Татнетны үстерү фонды, Татарстан Республикасы Мәгариф һәм фән министрлыгы, "Яңа гасыр" телерадиокомпаниясе һәм Г.Камал исемендәге Татар дәүләт академия театры тарафыннан Белем.ру порталы кысаларында үткәрелде. Тантанага ветераннар да килә алдылар, аларга кадер-хөрмәт күрсәтелде.
7. "Илһамият" сәнгатьле сөйләм бәйге-фестивале. Бәйгенең төп оештыручысы - Казан дәүләт мәдәният һәм сәнгать институты. Бәйге Татарстан Республикасы Мәгариф һәм фән министрлыгы, Казан шәһәре муниципаль берәмлеге башкарма комитетының Мәгариф идарәсе, Бөтендөнья татар конгрессының Казан бүлекчәсе, Татнетны үстерү фонды, Татарстан Язучылар берлеге ярдәме белән оештырылды. Чара искиткеч матур үтте (фоторепортаж).
8. "Соңгы кыңгырау" яшь шигырь язучылар бәйгесе. Әлеге бәйге уку елы тәмамланыр алдыннан зур булмаган аралыкта үткәрелде. Бәйгегә чыгарылыш сыйныф укучы балаларның үзләре язган шигырьләре кабул ителде. Бәйгенең җиңүчесе Шәйхелова Сәрбиназны түбәндәге фотода күрә аласыз.
9. "Аксу" интернет-телевидениесе. 2015-2016 елларда "Белем.ру" компаниясе "Аксу" компаниясе өчен татарча онлайн-интернет-телевидение ясау белән дә шөгыльләнде. Проект әле тест режимында гына эшли, әмма шулай да, сайтка кереп күп кенә файдалы һәм кызыклы тапшырулар карый аласыз.
Онлайн проект берничә телеканалны үз эченә ала:
10. "Аттестатлар тапшыру" ("Выдачи аттестатов") программасы. Әлеге программа 2015 елда яңа мөмкинлекләр ясалып яхшыртылды. Республиканың күп кенә районнарында аттестатларны "Белем.ру" оешмасы төзегән программа кулланып тапшыралар.
11. Татар укытучылары бллоглары. Татарча блоглар ясау һәм алып бару мөмкинлеге Белем.ру порталында 2016 елның гыйнвар аенда ачылды. Бүгенге көндә әлеге мөмкинлекне ныгыту, яхшырту эшләре алып барыла.
Моннан тыш, Татнетны үстерү фонды интернет челтәрендәге татар сайтлары һәм социаль челтәрләрдәге татар төркемнәре үсеше динамикасын күзәтеп анализлап бара, татар матбугаты һәм башка күп кенә татар оешмалары белән хезмәттәшлек итә.
Хөрмәтле кулланучылар!
Киләсе уку елына планнарыбыз зур. Киләчәктә дә безнең белән бергә булыгыз, бергәләшеп туган телебезне һәм татар мәгарифен саклыйк һәм ныгытыйк! Безгә идеяләр белән дә, финанс ягыннан да ярдәм итә алсагыз иде.
Татнетны үстерү фондының реквизитлары: http://tat-i.net/tt/blago.
Сезнең ярдәм белән без тагын да зуррак эшләр эшли алыр идек!