"Тукай Юлы – Путь Тукая" Халык проектын оештыру комитеты Татарстанның беренче җәяүле, велосипед сукмагы буйлап сәяхәткә чакыра.

Проектның максатлары:

• Татарстан һәм Россия халкын, шулай ук Татарстаннан читтә яшәүче татарларны актив һәм интеллектуаль ялга җәлеп итү;
• татар телен, көнкүрешен, гореф-гадәтләрен, йолаларын саклап калу;
• Габдулла Тукайның туган ягын, биографиясен һәм иҗатын, Казан артында яшәгән  күренекле шәхесләрне өйрәнү;
• "Тукай Юлы – ПутьТукая" маршруты буйлап авылларда тарих һәм мәдәният һәйкәлләрен торгызу;
• туристларга азык-төлек һәм хезмәт күрсәтү аша авылда эшлекле активлыкны арттыру һәм үстерү;
• "Тукай Юлы – Путь Тукая" дигән яңа мәдәни-туристик бренд булдыру.

 Халык проекты республиканың Арча, Әтнә, Балтач, Биектау  районнарыннан узачак.  

2019 елның 29 июнендә 10.00 сәгатьтә  Арча тимер юл станциясе мәйданында "Тукай Юлы – Путь Тукая" дигән яңа мәдәни – тарихи, экологик проект кысаларында җәяүлеләр, велосипедчылар һәм атта йөрүчеләр өчен яңа маршрут ачу тантанасы була.

Аннан соң сәяхәтчеләр Түбән Мәтәскә – Югары Мәтәскә – Мөндеш-Иске Кырлай – Яңа Иябаш-Яңа Кырлай авыллары аша  (21 километр) җәяү яки велосипедларда проектның беренче этабы буенча узачак. 

Юлда сезне: татар авылы мәдәнияте һәм көнкүреше, гүзәл табигать кочагы,  татар ашлары белән танышу көтә. Сәяхәт ахырында Габдулла Тукай музеена бару, мәдәни программа каралган.

Маршрутта: ял итү зоналары, кибетләр һәм кафе, кунакханә.

Автобуслар сәяхәтчеләрне Арчага 20.00 сәгатьтә кайтарачак.

Арчага Казаннан түбәндәге вакытларда электричкага утырып барып җитәргә мөмкин: 7.53, 8.15. Арчадан Казанга кадәр электричка вакыты: 21.24.