1-3 декабрьдә Казанда “Россия Федерациясенең мәгарифкә кагылышлы яңа законнары кабул ителү шартларында белем бирү системасында телләр (дәүләт телләре һәм туган телләр)” исемле төбәкара фәнни-гамәли семинар узды. Семинар “Туган (рус булмаган) һәм рус (туган тел булмаган) гомумбелем бирү оешмалары өчен төрки телләр төркеменә кергән телләрдән якынча гомумбелем бирү программасын формалаштыру буенча тәкъдимнәр комплексын эшләү” дигән федераль проект кысаларында узды.

Чарага Россия Федерациясенең 9 субъектыннан 150дән артык үз телләре язмышына битараф булмаган белгеч җыелган. Татарстан Республикасының Мәгарифне үстерү Институты рәсми сайты хәбәрләренә караганда, семинарның беренче көнендә М. З. Закиев (Татарстан), Р. Ф. Шафигуллина (Татарстан), И. В. Ярданская (Чувашия), Т.К. Шутина (Алтай), Е.Б. Тен (Саха (Якутия)), Р.Д. Сунчугашев (Хакассия), Ж.М. Дажиева (Кабардин-Балкар), Х.М. Сатпагарова (Карачаево-Черкесия), Ф.А. Ахмерова (Башкортостан), В.Г. Родионов (Чувашия), О.О. Иргит (Тува), Г.Х. Исмагилова (Татарстан) чыгыш ясаган.